Mansai tangkas do huingot, pigapiga taon na salpu, sungkunsungkun na mambahen ganggu rohangku songon halak Kristen na umposo (dohot deba donganku pe) i ma: aha do sangkap ni Debata tu bangsoNa? Ditolopi naung muba hita, ditolopi naung malua hita jala manjalo ngolu na imbaru di bagasan Jesus Kristus, aha do na masa dungkon ni i? Tontu, taboto do pandohan na tarbarita di Katekismus Singkat Westminster: ia tujuan utama ni jolma i ma pasangaphon Debata jala marlas ni roha di Ibana salelenglelengna: taboto do i, jala tahaporseai do i. Dimainhon hami do muse pigapiga hata na jempek, songon sada sian holan lima hata—haholongi ma Debata, haholongi ma donganmu jolma. Alai atik boha ndang adong sian angka i, manang pigapiga na asing na boi dohononnami, songon na hibul memuaskan. Jadi naeng paboaonku ma tu hamu di dia do pingkiranku maradian di na lam jonok ujung ni pardalananku di portibi on, jala i ma—dihalomohon Debata do bangsoNa gabe songon Kristus. Sarupa tu Kristus do lomo ni roha ni Debata tu bangso ni Debata.
Jadi molo tutu do i, na huusulhon ma on: parjolo ma pajongjonghon dasar alkitabiah ni panjouon tu haroroan ni Kristus; paduahon, laho mangalehon pigapiga tudosan di Padan na Imbaru taringot tusi; patoluhon, laho mambahen pigapiga kesimpulan na praktis. Jala sude i marpardomuan tu na gabe songon Kristus.
Jadi parjolo do dasar alkitabiah ni panjouon tu haroroan ni Kristus. Dasar on ndang sada teks: dasar i lobi substansial sian na boi dirangkum di bagasan sada teks. Ojahanna lobi sian tolu teks na denggan do hita rap maniop di pamingkirion dohot ngolu hakristenonta: Rom 8:29, 2 Korint 3:18, dohot 1 Johannes 3:2. Taida ma satongkin na tolu on.
Rom 8:29 tarjaha, nunga ditontuhon Debata hian bangsoNa asa sarupa tu rupa ni AnakNa: i ma asa gabe dos dohot Jesus. Sude do hita mamboto, di na madabu si Adam godang do na mago sian ibana—nang pe ndang sude—sian rupa hadebataon na tinompana i. Alai dipaulak Debata do i di bagasan Kristus. Pahombar tu rupa ni Debata marlapatan do i gabe songon Jesus: Hasarupaon dohot Kristus i ma sangkap ni Debata naung ditontuhon hian saleleng ni lelengna.
Turpuk paduahonku ima 2 Korint 3:18: “Alai saluhut hita, na so martujung bohina, marnida hasangapon ni Tuhan i, gabe suman tu Ibana, ai sian Tuhan i do Tondi i.” Jadi marhite Tondi na maringanan i sandiri do hita muba sian hasangapon tu hasangapon—parnidaan na luar biasa do i. Di tahap paduahon on gabe songon Kristus, parrohahononmuna do naung muba perspektif sian na jolo tu nuaeng, sian takdir ni Debata na manongtong tu hamubaonNa nuaeng di hita marhite Tondi Parbadia. Nunga muba sian sangkap ni Debata na manongtong laho mambahen hita songon Kristus, tu ulaon sejarahNa marhite Tondi ParbadiaNa laho paubahon hita gabe rupa ni Jesus.
I ma na mamboan ahu tu turpuk patoluhon: 1 Johannes 3:2. “Hamu angka haholongan, anak ni Debata do hita nuaeng jala ndang tarida dope songon dia hita sogot alai taboto do, molo dung tarida Ibana, doshon Ibana ma hita, ai idaonta do Ibana songon Ibana.” Ndang taboto tangkas songon dia hita di ari parpudi, alai taboto do na songon Kristus do hita. Sasintongna ndang pola botoonta lobi sian on. Nunga puas hita di hasintongan na marmulia i, i ma na rap hita dohot Kristus, songon Kristus, salelenglelengna. Dison adong tolu perspektif, i ma tingki naung salpu, tingki nuaeng, dohot tingki na naeng ro.
Sude i martudutudu tu sada arah: adong do sangkap ni Debata na manongtong, nunga ditontuhon hian hita; adong do sangkap sejarah ni Debata, hita do na dipauba, dipauba Tondi Parbadia; jala adong do sangkap ni Debata na parpudi manang eskatologis, gabe songon Ibana ma hita, ai idaonta ma Ibana songon Ibana. Sude na tolu i, na manongtong, na marsejarah, dohot na eskatologis, mardomu dompak sada ujung ni ha-Kristusan. On ma, husaranhon, sangkap ni Debata tu bangso ni Debata. I do dasar ni Bibel asa gabe songon Kristus: i do sangkap ni Debata tu bangso ni Debata.
Naeng ma nian hulanjuthon laho manggombarhon hasintongan on marhite pigapiga tudosan sian Padan na Imbaru. Parjolo, ninna rohangku ringkot do hita mambahen sada pernyataan umum, songon na binahen ni apostel Johannes di 1 Johannes 2:6: “na mandok mian ibana di bagasan Kristus, ingkon songon parange ni Kristus i do ibana marparange.” Dohot hata na asing, molo tadok hita halak Kristen, ingkon songon Kristus do hita. Dison ma contoh Padan na Imbaru na parjolo: ingkon songon Kristus do hita di bagasan InkarnasiNa.
Ra, adong do sian hamu na pintor sumurut ala ni biarna sian pingkiran sisongon i. Tontu, dohononmuna do tu ahu, Inkarnasi i sada peristiwa na sama sekali unik jala ndang mungkin boi ditiru manang na boha pe? Alus ni sungkunsungkun i, olo dohot ndang. Olo, unik do i, di bagasan pangantusion na diboan Anak ni Debata do hajolmaonta tu diriNa di bagasan Jesus na sian Nasaret i, sahali ro di salelenglelengna jala saleleng ni lelengna, ndang be mulak be. Tutu do i. Alai adong dope panghilalaan na asing na so unik di Inkarnasi i: asi ni roha ni Debata na luar biasa di Inkarnasi ni Kristus i do na ingkon ihuthononta saluhutna.
Inkarnasi, di bagasan pangantusion i, ndang na unik alai na marsaor do. Sude do hita tarjou mangihuthon tiruan ni hasereponNa na mansai balga i di na tuat sian banua ginjang tu portibi on. Jadi boi do disurathon si Paulus di Pilippi 2:5-8: “Songon i ma parrohaonmuna sama hamu.
