Ich erinere mich kans klaar, foer phaar yoer, tas ti frooch woo mich als yunge krist (un etliche fon mayn froynte aach) ferwunert hot, waar tas: was is Kot sayn opjektiif fer sayn folek? Wën mer uns keënert hon, wën mer keret kep sin un tas mer en nay leewe in Yeesus Kristus kriit hon, was khomt noch? Natierlich, hon mer ti pekhante ausxprechung fom Westminster Kurt Katekismus kekhënt: tas te mënx sayn haupste opjektiif is Kot se hërlich mache un tee fer imer se frooe: tas hon mer kekhënt, un hon tas klaawe kelos. Meyer hon aach mit welche khortse wërter kexpiilt, wii een fon ploos finef wërter — Kot liipe, tayn neekste liipe. Awer irchent wii, weer fon tëne, orer etliche anere woo mer erinere khonte, waar kans tsufriite lose. Soo, wil ich aych mit xpreche woo mayn ketanke khom sin, wii ich ticht am ën fon mayn piltungs rees uf te Eyert sin, un tas is — Kot wil tas sayn folek soo wii Kristus wërt. Kristus sayn wile is Kot sayn wile fer Kot sayn folek.
Soo, wën tas woer is, tuun ich tas folek foer xtele: eyerxt ti piplixe basis fer ti ruufe fer Kristus se sin; tsweetens, fer welche payxpiile fon tas fom Naye Testamënt kepe; tritens, fer etliche praktixe konklutsioone mache. Un tas ales hot se tuun mit wii Kristus wëre.
Soo, eyerst is ti piiplix basis fer ti ruufe fer Kristus se sin. Tiise basis is net en eensichste tëkst: ti basis is mee substansiaal wii in en eensichste tëkst enkapsuliert kewe khan. Ti xlisel kept eher fon tray tëkste woo mer kuut mache teete in unser kristlich ketanke un leepe tsusamer hale: Romanos 8:29, 2 Coríntios 3:18 un 1 João 3:2. Wole mer tiise tray khorts tsayt noo kuke.
Romanos 8:29 leest tas Kot sayn folek foer heyer pextimt hot fer tas pilt fon sayn Soon se hale: tas petayt, fer soo wii Yeesus wëre. Meyer al wise tas wii Aatam kefal is, hot eyer fiil ferloer — opwool net al — fon tëm kotliche pilt woo eyer kemacht kep waar. Awer Kot hot tas in Kristus tsurik kenom. Konformiteet mit Kot sayn pilt petayt soo wii Yeesus sin: Kristus is te eewiche foerxtëlungs opjetiiw fon Kot.
Mayn tsweet tëkst is 2 Coríntios 3:18: “Un mëyer al, mit te kesichter woo net kexlos këp sin, tuun ti hërlichkheet fom Hërkot siin, un wëre fon een hërlichkheet tsu te aner keënert, wayl tas khomt fon tëm Hërkot, woo te kayst is.” Soo, is es torich te inwooner Kayst selepst tas mer fon hërlichkheet tsu hërlichkheet keënert wëre — tas is een wunerlich wisioon. In tiise tsweet xrit fon Kristus sin, tuust tuu mërke tas ti perspektiif sich fon te ferkangheet pis hayt ferënert hot, fon Kot sayn eewiche foerxtëlung pis sayn present transformatsioon fon uns torich te Hayliche Keest. Es hot sich ferënert fon Kot sayn eewiche opjektiif fer uns soo wii Kristus mache, fer sayn historixe aarwat torich sayn hayliche kayst fer uns in Yeesus sayn pilt transformeere.
Tas pringt mich tsu mayn trite tëkst: 1 João 3:2. “Keliipte, mëyer sin Kot sayn khiner yets un es is noch nët taytlich was mer wëre, awer mëyer wise tas wën ëyer sich taytlich macht, wëre mer soo wii ëyer sin, wayl mëyer tuun tee siin wii ëyer is.” Mëyer wise nët in yeete kleenichkheet was mëyer in te lëtste taache wëre, awer mëyer wise tas mëyer wii Kristus wëre. Es kept wërklich khee prays tas mer mee wii tas wise. Meyer sin tsufriite mit te hërlich woerheet tas mer mit Kristus sin, soo wii Kristus, fer imer. Hier sin tray perspektiipe: ferkangne, hayt un tsukhunft.
Al fon tëne sin in te selwich richtung am tsayche: es kept Kot sayn eewiche opjetiiw, meyer sin foer heyer pextimt kep; es kept Kot sayn historixe opjektiif, meyer sin ferënert kep, transformeyert kep fon tëm Hayliche Keest; un es kept Kot sayn ën orer eskatolookix opjektiif, mëyer wëre soo wii Ëyer sin, wayl mëyer tuun Ëyer siin wii Ëyer is. Ti kanse tray, ti eewiche, ti historixe un ti eskatolookixe, tuun sich fersamle noo tëm selwiche ën fon te Kristus. Tas, ich saan, is Kot sayn opjektiif fer Kot sayn folek. Tas is ti piplixe basis fer soo wii Kristus se sin: tas is Kot sayn opjetiiw fer Kot sayn folek.
Ich wil wayter tiise woerheet mit en kans numer fon payxpiile fom Naye Testamënt iluustreere. Ëyerstens, ich mëne tas es wichtich is fer uns een alte ausxprechung mache, soo wii te aphostel Yoohan in 1 João 2:6 saat: “Weer saat tas eyer in Kristus playpt, sol soo wii eyer kang is.” In anere wërter, wën mer saan tas mer kriste sin, mise mer wii Kristus sin. Hier is tas eyerxte payxpiil fom Naye Testamënt: meyer mise wii Kristus in sayn Inkarnatsioon sin.
Ëtliche fon aych khëne sich klaych fon soo een itee ap lënke. Sicher, tuust tuu mich saan, ti Inkarnatsioon waar en kans unichnaner ewënt un khan net in en anere aat noo kekukt kewe? Mayn antwort fer tiise frooch is yaa un nee. Yaa, es waar eensichst, im sin tas te Soon fon Kot unser mënxheet tsu sich selepst kenom hot in Yeesus fon Nasareet, een mool fer imer un fer imer, fer nii mee se paseere. Tas is woer. Awer es kept en anere sin woo ti Inkarnatsioon net eensichst waar: ti erxtaunlich gnaas fon Kot in te Inkarnatsioon fon Kristus is fon uns al noo kekukt kewe.
Ti Inkarnatsioon, in tëm sin, waar net eensichst, awer universaal. Meyer al sin keruuft kep fer tas payxpiil fon sayn kroos teemuutichkheet noo keen, wii eyer fom himel uf ti Eyert runer khom is. Soo, khont Phaul in Filipenses 2:5-8 xraype: “Tuut tiise ketanke unich aych hon.
